Lima ka drayber positibo sa roadside drug test

CEBU, Philippines - Lima ka mga drayber sa pampublikong sakyanan dinhi sa dakbayan sa Sugbo ang nagpositibo sa laing hugna nga roadside drug testing nga gilusad sa Land Transportation Office (LTO)-7 kagahapong adlawa.

Ang laing hugna sa roadside drug testing gimando ni LTO-7 regional director Raul Aguillus diha sa may Imus Road ning dakbayan sa Sugbo gitambungan gyud mismo ni Department of Transportation and Communication (DOTC) Undersecretary Virginia Torres kagahapon sa buntag.

Matud ni Aguillus dihang nahinabi sa Banat News nga personal nga mianhi sa Sugbo kagahapong adlawa si Usec. Torres aron personal nga mosaksi sa mga roadside drug testing.

Matud ni Aguillus nga sa 50 ka mga drayber sa pampublikong sakyanan nga ilang napaubos sa roadside drug testing lima niini ang nagpositibo paggamit og ginadiling drugas.

Tulo niini mga drayber sa taxi, usa ang jeepney drayber ug laing usa ang bus drayber kinsa temporaryo dayun nilang gilangkatan sa lisensiya aron dili una makamaneho samtang nagpaabot sa resulta sa confirmatory test didto sa kaulohan.

Sa higayon nga magpositibo ang lima rebokahon na ang ilang lisensiya ug dili tugutang makalukat og balik kun dili mopaubos sa rehabilitation program. Matud ni Aguillus gihangop ni Torres ang roadside drug testing nga ilang gihimo ug gitinguha karong kopyahon kini aron ipatuman sa ubang rehiyon lukop nasud. (BANATNEWS)