CEBU, Philippines - Gidasig ni Mayor Jonas Cortes ang mga drayber sa traysikol sa kabarangayan nga maghugpong ug motukod og usa ka kooperatiba alang sa pagpangita og alternatibong panginabuhian nga andam tabangan sa kagamhanan.
Matud ni Cortes nga dili gyud tuyo sa iyang administrasyon nga wagtangon ang mga traysikol sanglit nahimo na man kining panginabuhian sa uban.
Giesplikar ni Cortes nga tungod sa mga kalamboan karon sa dakbayan dili kalikayan nga adunay maapektohan sa panginahanglan sa panahon sama sa pagdili na sa mga traysikol sa pipila ka mga dalan sa siyudad.
Ang Mandaue City dili palang dugay nanakop sa mga kolurom nga mga traysikol ug mga peke nga prangkisa ug gikontrolar ang gidaghanon niini tungod sa grabeng kahuot sa trapiko tungod sa mga traysikol.
Gipasalig ni Cortes nga dili gyud mawala ang traysikol sa Mandaue apan kasagaran niini adto na lamang sa kabarangayan ug dili na molahos sa mga nasudnong mga dalan.
Matud pa ni Cortes nga kung dunay kooperatiba ang mga drayber sa traysikol dako kaayo ang kahigayonan nga motakli ang mga drayber sa pagpalit og ilang kaugalingong jeep pasaheroan hulip sa traysikol. Si Cortes miingon nga andam ang dakbayan pagtabang sa maong sektor kun buot nilang motukod og kooperatiba. - BANAT NEWS