CEBU, Philippines - Doble ang nadawat nga ganti sa duha ka mga Sinulog Contingent gikan sa lalawigan sa Sugbo nga nakadaog sa Sinulog 2012 human tugbangi ni Governor Gwendolyn Garcia og samang kantidad ang nadawat nilang ganti gikan sa Sinulog Foundation Inc.
Pormal nga gitunol sa gobernador ang Pl.3 milyones nga ganti ngadto kang Mayor Nicepuro Apura sa dakbayan sa Carcar kansang mananayaw nahimong kampiyon sa Sinulog sa Kabataan sa Probinsiya ug nahimong 3rd placer sa Sinulog Based Category sa Sinulog 2012 Grand Parade ug midaog pa gayud kini sa Sinulog Street dancing category.
Gitunol usab sa gobernador ang P100,000 nga tseke ngadto kang Toledo City Mayor Aurelio Espinosa kansang sinulog contingent nahimutang usab sa ika-limang lugar sa Sinulog Free Interpretation Category. Matud pa sa gobernadora nga ang maong hinabang financial maoy katumanan sa iyang saad sa mga mananaog sa Pasigarbo sa Sugbo aron maningkamot pa kini nga modaog sa Sinulog.
Iyang gitataw nga dako kaayo ang garbo sa lalawigan sa Sugbo sa kadaogan sa Carcar ug sa Toledo sanglit nakita sa ilang mga sayaw ang kultura sa mga Sugboanon nga mao kanunay ang gi-promote sa lalawigan sa Sugbo aron makadani kini og mga turista.
Sila si Mayor Apura ug Mayor Espinosa nagpasalamat sa goberandor sa pagtuman sa iyang saad ug ilang gitataw nga mao kini ang labing makapasibot kanila nga maningkamot pa pag-ayo aron makaangkon na usab og laing kadaogan sa sunod nga Sinulog. - BANAT NEWS