CEBU, Philippines - Patay ang usa ka 61-anyos nga tigulang babaye human napagan sa pinusilay sa managsuon sa miaging alas-7 pasado sa gabii diha sa Espolarium St., sa barangay Duljo Fatima ning siyudad sa Sugbu.
Ang biktima giila sa kapulisan nga mao si Juanita Ramirez, 61, residente sa sitio Malinawon sa barangay Duljo Fatima.
Sa pasiunang imbestigasyon sa Homicide Section sa Cebu City Police Office (CCPO) nagbutyag nga naglakaw ang biktima sa lugar nga paingon unta kining mopalit og sud-an sa usa ka kan-anan dihang milanog ang buto-buto sa armas ug naigo sa iyang bukobuko ang biktima nga maoy nakaingon sa hinanali nga kamatayon.
Dugang imbestigasyon sa kapulisan ang magsuong Cabating nga sila si Romeo, 34, ug Elmer, 38, nagpinusilay human gikatahong nagkalalis sa wala matinong hinungdan.
Tungod ba kaha kay nakonsensiya ang usa kanila, si Romeo ang mitahan kang barangay Kapitan Elmer Abella sa maong lugar samtang ang iyang maguwang miikyas.
Lakip sa gitahan ni Romeo ang usa ka .38 snub-nosed revolver ug narekober sa crime scene ang duha ka kabhang ug duha usab ka buhi.
Si PO2 Esmer Escultor kinsa usa sa nag-imbestigar sa hitabo miingon nga si Romeo gidudahang sabog sa ginadiling drogas dihang kini mitahan.
Matud ni Escultor nga samtang gipaubos sa paraffin test si Romeo daw sa wala ra kini sakiti ug nagtanga lang niadtong higayona.
Giandam na sa kapulisan ang tukmang kaso nga ipasaka batok sa magsuong Cabating. (BANAT NEWS)