Padung sa disko napusilan angol

CEBU, Philippines - Kritikal ang kahimtang sa usa ka batan-ong lalaki human kini pusila sa mga wala hiilhing kriminal didto sa   sitio Tabok, barangay Camalig Bato, dakbayan sa Danao sa miaging kaadlawon.

Ang biktima mao si Jerwin Alcala, 18, ulitawo nga taga barangay Calapocan sa maong dakbayan.

Si PO1 Faron Avila sa kapolisan sa maong dakbayan nga nahinabi sa Banat News miingon nga nagsakay sa iyang motorsiklo ang biktima paingon sa barangay Camalig Bato kay manisko.

Apan matud pa ni PO1 Avila nga sa pag-abot sa biktima sa maong dapit giatangan kini sa duha ka wala hiilhing lalaki ug gipusil siya.

Natusak sa mga bala sa wala hiilhing kalibreng armas ang buko-buko sa biktima ug nahagbong kini sa motorsiklo nga iyang gisakyan dayon nanagan   pahilayo sa maong lugar ang mga kriminal.

Ang mga saksi nga nakakita sa biktima maoy mihatod kaniya ngadto   sa Danao District Hospital apan gibalhin kini ngadto sa Vicente Sotto Memorial Medical Center sa dakbayan sa Sugbo.

Sa pagkakaron padayon pang gipangita sa kapolisan ang mga kriminal.  - BANAT NEWS