CEBU, Philippines - Mokabat sa P400,000 ang gibanabanang danyos sa sunog nga nahitabo sa dalan Catalino C. Ouano sa barangay Looc, dakbayan sa Mandaue alas- 2 pasado ang takna sa hapon sa miaging Domingo.
Ang nasunog mao ang duha ka mga balay nga gipanag-iya sa managsuong Leonila ug Milagros Antigua nga napakgang sa pagkatap sa kabomberohan paglabay sa 24- minutos.
Si FO3 Cefriano Codilla, imbestigador sa Bureau of Fire Protection (BFP) sa maong dakbayan nga nahinabi sa Banat News miingon nga nagsugod ang kalayo sulod sa lawak nga gipaabangan sa tag-iya.
Matud pa ni Codilla nga gisusi karon nila kun unsa ka tinuod ang nahipos nilang kasayuran nga ang nataligam-ang gi-charge nga cellphone diha sa outlet maoy nakaingon sa maong sunog.
Hinuon wala makatapon sa sikbit pa nga mga panimalay ang kalayo ug walay gikataho nga kinabuhing nakalas o naangol atol sa maong insidente. - BANAT NEWS