CEBU, Philippines - Patay nang nadangat sa tambalanan ang 16- anyos nga lalaki human kini giunay og pusil patay sa iyang 14- anyos nga manghod tungod sa kasuko sa naulahi nga gibinuangan siya pinaagi sa text.
Ang insidente nahitabo sa usa sa mga barangay sa lungsod sa Tabogon niadtong Biyernes sa alas 12:30 sa udto.
Matud ni PO2 Junrey Frias sa Tabogon Police Station dihang nahinabi sa Banat News subay sa imbestigasyon nasuko ang suspek ngadto sa biktima human niya mahibaw-ing mao kini ang iyang nahimong ka-textmate.
Ang maguwang giingong nagpaila pinaagi sa text nga siya babaye ug diin silang duha nagkagustohay sulod sa pipila ka mga adlaw hangtud nga nahimo silang managhigugma.
Matud pa sa sinugdanan palang misakay o nagtuo gyud ang manghod nga babaye ang iyang ka-text apan nakamatikod kini nga makapila ka higayon na silang nagsabot nga magkita wala gyuy mitungha nga babaye sa lugar nga ilang gikasabotan.
Hangtud nga nadiskubrehan sa manghod nga ang iyahang maguwang diay maoy iyang ka-textmate ug nahimong uyab hinungdan sa kasuko niini ug gihagit og sukmagay ang biktima apan nalupig siya sa maguwang.
Sumala pa sa polis nakahinumdom ang suspek sa .38 kalibre nga paltik gitagoan sa biktima sa kwarto ug gikuha kini ug gibalikan ang biktima dayong pusil sa nagtalikod nga biktima.
Patay dihadiha ang biktima human maigo sa luyong bahin sa ulo nga milapos ang bala sa agtang wala na kini matabang pa pag-abot sa Juan Dosado Hospital ang biktima sa lungsod sa Sogod.
Ang suspek nadakpan dayon sa mirespondeng mga polis ug nakuha usab ang armas nga gigamit sa krimen.
Ang kapulisan mitugyan sa suspek ngadto sa Department of Social Welfare and Development (DSWD) alang sa kustodiya ug gitun-an pa kung mapasakaan ba kini og kaso.(EIM) (BANATNEWS)