Kanhi VM mosuporta sa asawa

CEBU, Philippines - Si kanhi Bise Mayor Aberdovey Belleza sa dakbayan sa Talisay mibutyag nga wala pa siya’y plano nga mokandidato sa eleksiyon sa sunod tuig apan mikompirma nga andam siyang mosuporta sa iyang asawang si kanhi Konsehal Shirley Belleza ug sa uban pang mga mokandidato ubos sa Liberal Party (LP).

Si Belleza sa pakighinabi sa Banat News kagahapon mibutyag nga adunay miduol kaniyang mga politiko kinsa miawhag kaniyang pakandidatohon sa umaabot nga eleksiyon .

Apan matud pa sa kanhi bise mayor nga mas ganahan siya sa negosyo kay sa pamolitika,“I’d rather prepare sa business than politics…, naka move-on ko sa kinabuhi nga wala na ko sa politika”.

Bahin sa plano sa iyang asawa nga si Shirley nga mokandidato sa pagka-konsehal ubos sa partido independente  sa piniliay sa tuig 2013, ang kanhi bise mayor nagkanayon nga suportahan niya kutob sa iyang mahimo ang iyang asawa. “makita nga she is a good legislator”, matud pa ni Aber.

Gibutyag usab niya nga gawas sa iyang asawa aduna usab siya’y laing suportahan nga mga mokandidato sa eleksiyon sa sunod tuig sa Talisay.

Sa piniliay niadtong 2010, si Belleza misandig sa LP ug   maoy hinungdan nga makigtagbo unta kaniya ang iyang mga kauban sa partido apan iya kining gibalibaran tungod sa kalingaw niya sa iyang negosyo.

Ang kanhi bise mayor midugang nga pito sa 22 ka mga kapitan sa barangay sa Talisay mga kaalyado sa Liberal Party.  (BANATNEWS)