Silhig Festival sugdan sa Paknaan

CEBU, Philippines - Ang barangay Paknaan sa dakbayan sa Mandaue mopahigayon sa ilang labing unang Silhig Festival nga gipaabot nga salmotan og pito ka mga contingents gikan sa mga sitio sa maong barangay karong Enero 26 niining tuiga.

Si Paknaan Brgy. Kapitan Malaquias Soco nga nahinabi sa Banat News miingon nga tumong nila nga pinaagi sa indigay ma-promote ang ilang produktong silhig nga lanot sa buli.

Matud pa ni Soco nga nahimo nang panginabuhian sa mga lumad nga molupyo sa maong dapit ang pagpamuhat og silhig nga gigama gikan sa lanot sa buli.

Ang maong indigay sa mga contingents magsugod sa street dancing ug showdown nga dunay mokabat 30 ngadto sa 60 ka mga dancers sa matag contingents.

Adunay giandam nga P15 mil sa kampeyon, P10 mil sa ikaduhang ganti ug P5 mil sa ikatulong mananaug niini samtang P1,000 usab ang consolation prize isip pahalipay sa mga dili palaron.

Sa nasayran nga ang barangay Paknaan nagpasiugda usab og ilang bersyon sa Sinulog isip kabahin sa mga kalihokan sa matag tuig nga pangilin ni Senyor Santo Niño. (/EIM) (BANATNEWS)