CEBU, Philippines - Gipatak-opan sulod sa tulo ka bulan ang unom ka mga internet café sa dakbayan sa Lapulapu human kini makalapas sa ordinansa nga nagdili sa mga tinun-an pagsulod sa maong mga establisemento sa panahon nga adunay klase.
Gipakita ni Lapulapu City Secretary Rolando Duero ang unom ka “Closure Order” nga giluwatan ni Mayor Paz Radaza niadtong Enero 10 ning tuiga ug pormal kining gisilbi ngadto sa mga hingtungdan.
Ang gipatak-opan mao ang GS Internet Café nga gipanag-iya ni Randy Gastador sa Barangay Ibo, Hope internet nga gipanag-iya ni Hope Lopez sa Barangay Basak, Internet café ni Roufel Mahusay, Ambrosio dela Cruz, Ben Internet ug Florabel Vargas nga pulos nahimutang sa Mahusay Compound sa Barangay Punta Engano, sa maong dakbayan.
Matud pa ni Mayor Radaza nga kini usa ka mensahe sa mga may internetan nga seryoso sila sa ilang pag-implementar sa Ordinance 363-2006 nga nagdili sa mga tinun-an sa pagsulod sa mga internetan sa panahong may klase ang eskuylahan. - BANAT NEWS