Opisyal sa PDEA naabswelto sa kaso

CEBU, Philippines - Naabswelto sa kasong homicide ang deputy regional director sa Philippine Drug Enforcement Agency (PDEA) 7 human mapakyas ang prosecution sa pagmatuod nga kini sad-an.

Si Levi Ortiz sa wala pa mahimong opisyal sa PDEA, usa ka sakop sa Philippine National Police   diin gipasakaan siya og kasong pagpatay    sa usa ka Leonardo Reyes.

Si Reyes namatay sa bilyaran sa sitio Ilang-Ilang, barangay Lagtang, dakbayan sa Talisay niadtong Pebrero 23, 2002 sa pakig-engkuwentro niini kang Ortiz.

Base sa 15ka pahina nga desisyon ni RTC-Branch 20 Presiding Judge Bienvenido Saniel nasayran nga si Reyes niadtong higayona giingong hubog kaayo busa gipasalbahan ni Ortiz makaduha ka higayon isip warning shot.

Apan miatubang kini kang Ortiz kay buot untang mopusil sa polis, maoy hinungdan nga giluthang ni Ortiz ang ubos nga bahin sa tiil sa biktima.

Si Reyes bisan samaron na   milanit kini sa iyang .45 kalibre nga pistola sa tuyo nga pusilon si Ortiz.

Agi og depensa sa iyang kinabuhi, gigamit ni Ortiz ang iyang    M16 armalite ug girakrakan si Reyes hangtod nga kini namatay.

Ang kamatayon sa biktima maoy gibasehan sa kasong giatubang ni Ortiz sa maong higayon.

Sa desisyon ni Saniel iyang nakita nga ang gihimo ni Ortiz “in-line” o may labot sa iyang pagtuman sa katungdanan isip polis ug pagsalbar sa iyang kaugalingon.

Si Ortiz mitug-an sa Banat News   sa iyang kahinangop sa desisyon sa hukmanan.“Tungod atong kasoha maoy naghatag nako og drive to prove them wala koy sayop nga nabuhat,” matud pa ni Ortiz.

Mitug-an usab si Ortiz nga hilabihan siya nga nakuyawan sa maong kaso apan wala siya mawad-i og paglaom nga motumaw gayud ang kamatuoran.  - BANAT NEWS