CEBU, Philippines - Misipa karon ang huhongihong nga si Kongresista Eduardo Gullas sa ikaduhang distrito sa lalawigan sa Sugbo molansar sa pagka-mayor sa dakbayan sa Talisay karong umaabot nga eleksyon sa 2013.
Kung mahinayon ang maong plano ug modaug siya, mahimong ikaduha kining higayong mamayor si Gullas sa maong dakbayan sukad niadtong 2001, diin siya’y unang mayor sa pagkasiyudad sa Talisay gikan sa pagka-lungsod niini. Sa pagkakaron si Gullas anaa na sa kataposang termino sa iyang pagka-magbabalaod sa kongreso. Sa samang higayon may huhongihong usab nga ang apo niini nga si Talisay City Councilor Eduardo “Digul” Gullas III maoy mo-bise mayor sa iyang apohan sa sunod tuig nga eleksiyon. Matud pa sa Kongresista nga kanunay niyang nahinumdoman ang panultihon sa iyang inahan nga matud pa “the sunshine is for everyone”.
Si Gullas nagkanayon nga kung magkaduol na gani ang eleksiyon dili gyud malikayan ang mga huhongihong.
Sa bahin sa iyang apo , si Gullas nangutana kun “is he qualifies?” tungod kay nagpanuigon pa lang karon og 19-anyos si Digul.
Apan matud sa Kongresista nga dili siya mosulti nga “dili” kay sa pagkakaron busy siya sa iyang adbokasiya nga mao ang pagbukas sa UV Gullas Leadership Institute ug mitabang usab siya sa iyang asawa sa proyekto niini nga landscaping atubangan sa city hall sa Talisay.
“I am not saying never…, but I am quiet busy right now because of this advocy”, ni Gullas pa. Sa laing bahin si Bise Mayor Alan Bucao mipadayag usab nga naghunahuna unta siyang mokandidato sa pagka- mayor sa Talisay kung ugaling hatagan siya og higayon.
Hinuon, uyon usab siya kung bise mayor lang gihapon ang iyang daganan sa sunod tuig nga eleksiyon.
Ang bahin sa isyu nga ang anak ni kanhi Gobernador Lito Osmeña nga si Mimo Osmeña molansar sa pagka-kongresista sa unang distrito sa lalawigan sa Sugbo, kini gikagubtan usab karon sa Talisay.
Apan matud ni Gullas nga sa milabay’ng eleksiyon tulo ka Sugboanong mga politiko nga sila si Lito Osmeña, Serge Osmeña ug Dodong Maambong ang iyang gitabangan diin giapil niya kini sa iyang sample ballot nga gipanghatag sa tibuok unang distrito ug ang maong tabang iya lang kadtong kabubot-on. Kun mahinayon ang plano sa mga Osmeña, may posibilidad nga ikaatbang niini ang anak ni Gullas nga Didi Gullas kinsa mokandidato usab sa pagka-kongresista sa unang distrito sa lalawigan.
Apan matud pa ni Gullas nga mag-agad sa ilang mga lider kung kinsay pilion niini, si Didi ba o ang iyang apo nga si Samsam. (BANAT NEWS)