DUMAGUETE CITY, Philippines – Mipiyansa ang usa ka Swiss national diha sa Negros Oriental trial court human masayring aduna nay migawas nga warrant of arrest batok kaniya tungod sa kasong child abuse.
Ang suspek giilang si Andreas Maurer, nagpuyo sa Guihulngan City, Negros Oriental, mibutang og P80,000 nga piyansa alang sa iyang temporaryong kagawasan sumala pa ni Chief Insp. Errol Garchitorena, Jr., sa Guihulngan Police sumala pa sa report sa PNA.
Si Maurer bag-ohay pang naabot gikan sa gawas sa nasud ug pagkasayod nga aduna siya’y warrant of arrest boluntaryo kining mitahan sa kapolisan.
Ang maong langyaw gipasakaan og kasong kalapasan sa Republic Act 7610 o “Special Protection of Children Against Abuse, Exploitation and Discrimination Act”, matud pa ni Garchitorena.
Sumala pa nga ang kaso may kalambigitan sa pasangil nga naangol ang usa ka batang gitugpo-tugpo ni Maurer nga gialegar nga natagak sa usa ka dike sa Guihulngan samtang kini hubog sumala pa ni Garchitorena. Ang maong warrant of arrest gipagawas ni Judge Fe Lualhati Bustamante sa Regional Trial Court Branch 64 sa Guihulngan niadtong Oktubre 18, 2011. (BANATNEWS)