Kusina sa kan-anan miulbo mga kustomer nanglayat

CEBU, Philippines - Naglumba og layat ang mga kustomer sa Pier 1 Grill sud sa Parkmall sa Mandaue Reclamation Area human miulbo ang kalayo sa kusina niini sa milabay’ng gabii.

Matud pa ni Mandaue City Fire Marshal Rogelio Bongabong ang sunog nagsentro lamang sa kusina sa Pier 1 Grill ug maayo nalang kay wala kini mokatap sa tibuok edipisyo.

Atol sa imbestigasyon nasuta sa kabomberohan gidakop sa kalayo ang mantika sa kusinero nga nagluto og crispy pata.

Mikatap ang kalayo sa exhaust panel palibot sa maong edipisyo hinungdan nga gikulbaan ang mga kustomer ug naglumba og panagan pahilayo sa maong dapit.

Duha ka mga firetrucks sa Mandaue City Fire Station ang miresponde apan igo nalang silang mitiwas sa pagpalong sa kalayo tungod kay nakontrolar kini dayon sa usa ka trabahante sa maong kan-anan nga si Herbert Mahinay gamit ang fire extinguisher.

Matud pa ni Judith Leyte Celmer ang marketing manager sa maong restaurant nga kanunay silang manglimpiyo sa ilang mga kagamitan ug nahibulong sila sa kalit nga pag-ulbo sa kalayo ug miagi sa ilang exhaust panel.

Tungod sa maong insidente adunay mga kustomer nga wala na makabayad sa ilang gikaon apan gisabot nalang sila sa management tungod kay mas importante kanila ang kaluwasan sa ilang mga parokyano.

Gipasalamatan usab ni Celmer si MCPO Deputy Director for Operation Supt. Renato Dugan kinsa nagkaon sa maong kan-anan nianang mga hitaboa ug nga mitabang sa luwas nga pagpagawas sa mga kustomer nga dili mag-panic.

Wala modeklarar og danyos ang management sa maong kan-anan human nila masuta nga walay dagkong kabtangan nga nasunog. (BANATNEWS)