Yuta sa Buhisan midahili mga residente gipabalhin

CEBU, Philippines - Naalarma ang mga residente sa sitio Puti, Barangay Buhisan niining dakbayan sa Sugbo kagahapon sa alas-3 sa kaadlawon human nahulpa ang yuta gikan sa ibabaw sa bukid.

Sumala pa sa sakop sa Cebu City Risk Reduction Management Council (CCRRMC) nga si Molly Guarin nga wala’y naapektohan nga mga balay sa maong paghulpa apan ang 14 ka mga pamilya nga duol sa area ilahang gipabakwit gumikan sa posibilidad nga modako pa ang landslide gumikan sa kahumok sa yuta.

Nagkanayon siya nga mas maayo nga maniguro na lang gyud hinungdan nga ilaha na daan nga gipabakwit ang nagpuyo dapit sa lugar nga gihugpaan sa yuta.

Ang mga residente sa maong dapit kasamtangang nag-istar sa Buhisan Sports Complex ug sa Barangay Hall.

Nagkanayon si Guarin nga ang hinungdan sa paghulpa sa yuta mao ang sagunson nga uwan sa miaging adlaw nga miresulta na sa pagkahumok sa yuta. Nakaalerto karon ang CCRRMC sa mga barangay nga kasagaran nga moigo ang mga paghugpa sa yuta.

Una na nga gideklarar sa miaging buwan nga state of calamity ang tanang bukirang barangay sa dakbayan sa Sugbo gumikan sa epekto sa mga dagkong baha ug pagdahili sa yuta gumikan sa mga pagbaha ug uwan.

Gipadayag kaniadto ni Konsehal Roberto Cabarrubias nga moabang usab og dugang mga heavy equipment ang siyudad aron maoy mosulod sa mga bukirang barangay nga naapektohan sa mga landslide sanglit dunay ubang dapit ang lisod pa sudlan og mga sakyanan.

Gawas sa Buhisan, pipila sa mga dapit nga kasagaran ig-on sa landslide panahon sa uwan naglangkob sa Barangay Budlaan, Agsungot, Buot-Taop, Tabunan, Kalunasan, Sapangdako ug uban pa. (BANATNEWS)