Tag-iya gustong mabawi ang mga alahas

CEBU, Philippines - Ang pamilyang Tan gustong mabalik kanila ang ilang mga alahas nga nakit-an sa mga basurero sa dumpsite sa barangay Umapad siyudad sa Mandaue niadtong Martes.

Si Atty. Inocenio dela Cerna mibutyag sa mga sakop sa media nga ang pamilyang Tan miduol kaniya ug nagpakitabang kalabot sa ilang alahas nga nakaplagan sa mga  basurero.

Matud pa ni dela Cerna nga dako ang pagtuo sa pamilyang Tan nga ilang nalakip sa paglabay ang mga alahas nga wala nila mabantayi.

Dugang pa ni Dela Cerna nga kasamtangan sila karong nangolekta sa mga gikinahanglang dokumento aron ilang mabawi ang mga alahas nga tua pa sa mga kamot sa Mandaue City Government.

“We are still collecting all the records, the receipts. However, in the absence of receipts the affidavit will do,” pasabot pa ni Dela Cerna.

Samtang mibutyag usab si Dela Cerna nga iyang isugyot ngadto sa pamilyang Tan nga pahatagan og reward ang nakakita sa mga alahas samtang ang kadtong mga basurero nga nakakaplag unya giprenda ang alahas dili nalang ipagukod.

Sa laing bahin, ang kanhi Executive Judge Miendrado Paredes sa Regional Trial Court (RTC) mibutyag nga ubos sa Civil Code kun si kinsa man ang nakakita og mga susama sa alahas gikinahanglan gyud nga i-turn-over kini ngadto sa buhatan sa mayor ug ang naulahi mao na usab kini mangita sa tag-iya.

“Under the Civil Code it will be given to the mayor and I think the government will give 10 percent to those who found it,” pasabot pa ni Paredes.

Kahinumduman nga niadtong miaging Martes (Enero 12) ang mga basurero sa barangay Umapad nakaukay sa mga basura og nagtapok nga alahas.

Tungod niini, ilang gipanguha ug tagsa-tagsa usab kini nila nga gibahin-bahin ug dunay uban kanila nga miprenda niini sa ahensya.

Apan giingong adunay usa sa mga basurerong wala mabahini ang giingong mipakatap sa estorya hinungdan nga napublikar kini og maayo.Ang alahas gibanabana nga mokabat sa dul-an P2 milyones nga gipanag-iya sa pamilyang Tan.

Nasayran nga natultulan sa kapolisan kun si kinsa ang tag-iya sa diha nga adunay usa ka class ring nga gipanag-iya ni Vicente Tan.(EIM)  (BANATNEWS)