CEBU, Philippines - Wala sipyata ni Arsobispo sa Sugbo Jose Palma nga hisgutan ang nagpabiling isyu sa Reproductive Health (RH) Bill atol sa gipahigayon pontifical mass kagahapong sa buntag didto sa Basilica Minore del Santo Niño kagahapon sa kaadlawon.
Atol sa Santos nga Misa si Palma miingon nga dako ang iyang pagsalig sa Sugbu tungod sa nakita niining kadaghan sa mga misupak sa RH Bill.
Isip mga deboto ni Senyor Sto. Niño si Palma miingon nga nagmaya siya sa gipakita sa mga Sugboanong supak sa RH Bill nga iyang gihulagway nga usa ka balaudnong nagbutang sa peligro sa kabataan.
Ang tema sa kapistahan karon nga “Sto.Niño a refuge of Filipino Family,” matud pa ni Palma haom sa panimbasog karon sa Simbahan batok sa RH Bill. “Sama ni Sto.Niño nga usa ka bata, kinahanglan nato nga panalipdan, atimanon ug hatagan og maayong pagtagad ang atong mga kabataan,” matud pang Palma.
“This (RH Bill) is a real threat sa mga kabataan ug mag-ampo kita nga di modaog ang RH Bill nga motapos sa kinabuhi sa kadaghanang bata nga wa pa mahimugso,” dugang pa niini.
Subli usab nga gipasalamatan ni Palma ang mga magbabalaud ug mga opisyal sa kagamhanan sa Sugbo nga nagkahiusa sa ilang pagsupak sa maong balaudnon.
“Salamat nila (mga Sugbuanong politiko) nga mipakita nga sila pro-life ug akong usbon edukasyon ang kinahanglan dili aborsyon o kontrasepsyon,” matud pa ni Palma.
Nagpasalamat hinuon si Palma sa programa sa gobiyerno alang sa edukasyon nga mao ang K+12 nga gihulagway niyang nakakita na ang gobiyerno sa panginahanglan sa pagpalambo sa edukasyon sa nasud. (BANAT NEWS)