Gwen misayaw sa La Torta contingent

CEBU, Philippines - Pagpasalamat kang Sr. Sto. Niño maoy tumong sa pagsalmot ni Governor Gwendolyn Garcia sa Sinulog Mardigras kagahapon

Matud pa sa gobernador nga sulod na sa walo ka tuig wala siya’y palta sa pagsayaw sa matag Fiesta Senior busa labi siyang gibendisyonan niini sa iyang pangagamhanan sa lalawigan sa Sugbo.

Ang gobernador misayaw uban sa mga contingent sa La Torta Festival sa lungsod sa Argao.

Matud pa sa gobernador nga nakita niya ang daghang   milagro ni Sr. Sto. Niño dinhi sa Sugbo nga mao kini ang nagsalbar sa lalawigan gikan sa mga kalamidad.

Matud pa niya nga walay laing tigpanalipod sa katawhan dinhi gawas kang Sr. Sto. Niño hinungdan nga mao kini ang giludhan niya adlaw ug sa gabii ug gisangpit nga labing bendisyonan niini ang lalawigan sa Sugbo aron molambo ang panginabuhi sa mga Sugboanon.

Matud pa sa gobernador nga gumikan sa iyang pangaliya, walay mga bagyo, baha, linog, ug tsunami nga miabot sa Sugbo.

Apan ang nagbaha nga mga turista ug ang kaayo sa pananom sa mga mag-uuma maoy natagamtaman sa tanan tungod  sa tabang ni Sto. Niño, busa sa tibuok niyang kinabuhi wala siyay laing simbahon ug alagaran gawas kang Sr. Sto. Niño kay mao kini ang naghatag kaniya og kinabuhi.

Labaw sa tanan alang sa gobernador si Sr. Sto Niño maoy naghatag kaniya og debuenas nga bisan sa eleksyon kanunay siyang midaog ug ilabi na karong umaabot na usab ang eleksyon wala siyay laing sandigan sa iyang pangaliya gawas kang   Sto. Niño.

“My constant prayer for his continued guidance alang kanako sa pag-atubang sa akong mga responsibilidad isip inahan sa lalawigan and his continued protection of Cebu”, matud pa ni Garcia.

Mapasalamaton usab si Garcia sa pagkahiusa karon sa lalawigan sa Sugbo ug sa dakbayan sa Sugbo nga gipangulohan nilang duha ni Mayor Michael Rama.

Matud pa ni Garcia nga ang kalamboan sa tibuok lalawigan sa Sugbo nakahatag og inspirasyon sa tanang Sugboanon ug kining tanan hatag ni Sr.Sto Niño. (BANAT NEWS)