Tulo mangunguot nadakpan
CEBU, Philippines - Tulo ka mga tawo nga gidudahang mangunguot ang nadakpan sa mga sakop sa Theft and Robbery Section (TRS) sa Cebu City Police Office (CCPO) atol sa fluvial procession kagahapon sa buntag.
Ang nangadakpan mao sila si Carlito Ablay, 33, Lester Ablay, 18, pag-umangkon ni Carlito ug Garry Pantollano, 18, nga taga barangay San Roque.
Sila gisikop sa kapulisan human giingong nagtinabangay sa usag-usa aron makuha ang digital camera nga gipanag-iya ni Raniel Jose Castaneda.
Si Inspector Rolando Pinili, hepe sa Theft and Robbery Section (TRS) nagkanayon nga mga local boys lang ang ilang nadakpan nga nipahimulos sa kahigayonan atol sa fluvial procession.
Matud ni Pinili ilaha hinuong nabawi ang digital camera sa biktima gikan sa mga suspetsado.
Apan si Carlito hugtanong mihimakak sa pasangil ug nagkanayon nga si Lester mao gyud ang nikuot sa butang.
Si Castaneda, usa ka free lance photographer nagkanayon nga diha siya sa pier area nagsige og kuha’g hulagway dihang ang mga suspetsado nikuha sa iyang digital camera nga nagkantidad kini og P5,000.
Sa miaging adlaw laing duha ka grupo sa mga kiriwan og kamot ang nasikop usab sa TRS dikan sa Mindanao ug Manila. (BANATNEWS)
- Latest
- Trending
