Giduwaang uling nakasunog

CEBU, Philippines - Ang nagbaga nga uling nga gidulaan sa 4- anyos nga bata nga gibutang sa bungbong nga amakan maoy nakaingon sa pagkasunog sa usa ka panimalay sa Purok Kalabasa, barangay Gun-ob, dakbayan sa Lapulapu alas 3:45 ang takna sa hapon niadtong miaging adlaw ug suwerte nga nadali sa pagpawong sa mga silingan ug wala kini mahingpit sa pagkaugdaw.

Si FO2 Climaco Salisid sa Bureau of Fire Protection (BFP) sa maong dakbayan nga nahinabi sa Banat News miila sa tag-iya sa nasunog nga panimalay mao si Tomasa Tumulak.

Matud pa ni Salisid nga pipila lang ka bahin sa maong panimalay ang gikaon sa kalayo tungod sa daling pagresponde sa mga tawo nga mibubo og tubig.

Sa ilang pakisusi nasuta nga usa ka 4-anyos nga batang nagdula og baga sa uling sa abohan ug gitongtong sa bongbong nga amakan.

Gibanabana nga mokabat lamang sa P800 ang gibilin nga danyos sa maong sunog ug walay gikataho nga naangol atol sa maong hitabo. (BANATNEWS)