CEBU, Philippines - Napaksit ang bagolbagol sa usa ka tawo dihang natapsingan kini sa bala sa armas nga gigamit sa usa ka hubog sa pagpusil kaniya kinsa natigbasan usab niya sa iyang sundang didto sa barangay Yati, lungsod sa Liloan sa miaging gabii.
Si PO2 Rochele Jugalbot sa kapolisan sa maong lungsod miila sa napusilan nga mao si Ronald Olivirio Tejerei, 36, minyo nga lumad nga taga Medellin, Cebu ug ang suspetsado mao si Isabelo Uy, hingkod nga nagpuyo sa Yati.
Matud pa ni PO2 Jugalbot nga nagluto lang ang biktima og sud-an sa gawas sa giabangan nga tindahan niini sa maong lugar ug ang suspetsado kinsa hubog nga nahiagi sa maong dapit nasabod sa kahoy nga igsusugnod sa biktima busa mihiwasa kini sa kasuko .
Unya matud pa ni PO2 Jugalbot nga sa kalagot ug kapungot niini nagbagulbol nga naglakaw pauli sa ilang panimalay.
Apan kalit kining mibalik nga nagbitbit na og armas de fuego nga wala matino ang kalibre.
Si Nino Consas nga silingan ni Tejerei nga nakakita sa gibitbit nga armas sa suspetsado dali nga misinggit ngadto sa biktima aron makadagan kini ug dili mapusilan.
Busa midagan ang biktima apan gigukod kini sa suspetsado ug gipusil, apan maayo kay igo lang natapsingan ang ulo busa wala siya maintimano apan natumba siya sa karsada.
Unya giduol sa suspetsado kay tiwasan apan igo nalang mihagtik ang gatilyo sa iyang armas kay nahutdan og bala.
Dihang mitimbakuwas og bangon ang biktima milanit kini sa gitangkil niyang sundang ug gitigbas ang bukobuko sa suspetsado, apan bisan nagtabisay ang dugo ang nahauna mikaratil og dagan sa kahadlok nga tiwason siya pag-ihaw sa iyang gipusil.
Dali nga gidala ang biktima ngadto sa Vicente Sotto Memorial Medical Center sa dakbayan sa Sugbo samtang ang suspetsado gipangita sa kapolisan apan gituohan nga gidala usab kini og pribadong tambalanan. - BANAT NEWS