CEBU, Philippines - Usa ka wanted sa kasong murder ang nasikop atol sa gipahigayong saturation drive sa kapolisan niadtong Biyernes sa gabii diha sa sitio Mahayahay, A. Lopez, barangay Labangon, dakbayan sa Sugbo.
Ang nasikop mao si Marciano Villanueva, residente sa maong dapit kinsa dunay pending warrant of arrest sa kasong murder diha sa sala ni Regional Trial Court (RTC) Judge Eric Menchavez sa Branch 21.
Si Villanueva kinsa usa sa Ten Most Wanted Person sa dakbayan sa Sugbo ang wala tugoting makabutang og piyansa alang sa iyang temporaryong kagawasan.
Si Chief Inspector Romeo Santander, hepe sa Cebu City Police Office Intelligence uban nila ni Inspector William Alicaba ug Inspector Proferio Gabuya, deputy for operation ug administration uban usab sa mga sakop sa Barangay Peace Action Team (BPAT) ug Team II personnel nga gipangulohan ni SPO1 Buenaventura Ursaiz ang mipahigayon og saturation drive diha sa lugar.
Atol sa maong operasyon ang kapolisan nakadawat og report nga si Villanueva giingong nasigpatan sa maong dapit.
Ang grupo ni Santander daling miadto sa giingong nahimutangan ni Villanueva ug ilaha kining nasikop. (BANATNEWS)