CEBU, Philippines - Liboan na usab ka mga deboto ang mohugop sa kadalanan alang sa tradisyonal nga ‘Walk with Jesus’ karong kaadlawon nga maoy timaan sa pagbukas sa siyam ka adlaw nga nobenaryo sa kapistahan ni Senyor Santo Niño sa Sugbo.
Anha kini manukad sa Fuente Osmeña Rotunda ug ang mga deboto dala ang kandila, rosaryohan ug mga imahe sa Senyor Santo Niño motaak sa naandan nang rota sa foot procession nga matapos diha sa Basilica Minore del Santo Niño.
Mangulo sa prosesyon mao ang mga Augustinian Friars, parishioners ug confraternity of Our Lady of All Nations.
Human sa prosesyon usa ka Santos nga Misa nga pangulohan ni Rev. Fr. Rodolfo Bugna ang ipahigayun sundan usab sa pag-instalar sa bag-ong hermano ug hermana mayores.
Gawas sa mga deboto, gatusan usab ka mga security personnel gikan sa Philippine National Police, Cebu City Traffic Operations Management (CITOM) ug mga barangay tanod ang gipakatap sa kagamhanan sa rota.
Gawas pa niini, aduna usab ipakatap nga mga sakop sa City Squatters Prevention and Encroachment Elimination Division nga maoy mohawan sa agian sa rota sa prosesyon. - BANAT NEWS