Patay ang negosyante og bakery ug naangol ang iyang helper human sila gi-ambusan sa duha ka lalaking nagtaptap sa ilang nawong samtang paingon na untang mamauli gikan nangompra og uling diha sa sitio Goya barangay Prenza, Balamban niadtong Lunes sa alas 7:00 sa gabii.
Ang biktima mao si Basilisos Belda,38, nagpuyo sa barangay Beto, Balamban ug nanag-iya og bakery sa maong lugar samtang naangol ang panadero niining si Benjamen Condrilon, 23.
Duha ka mga lalaking hamtong nga pulos nagtaptap og senina sa ilang mga nawong maoy gitumbok nga mipaulan og bala sa mga biktima.
Matud ni PO1 Rodney Camarijan sa Balamban Police dihang nahinabi sa Banat News ang gipalit nga uling sa mga biktima gamiton unta sa ilang pagluto og pan.
Apan samtang nag-angkasay ang duha sa motor nga gimaneho Belda paingon na pauli kalit lang silang gibabagan sa duha ka lalaki nga mipara ug nagtion kanila og armas.
Dihang mihunong si Belda kalit kining gipusil sa duha ka lalaki. Si Belda naigo sa bukobuko samtang natapsingan sa tuong bukton si Condrilon.
Pagkahuman bisan og samaron sa bukobuko nakahimo pa pagkanaug sa motor ang biktima dayong suway og dagan pahilayo apan gigukod kini ug gidul-itan sa tuong tampihak nga maoy nakaingon sa kamatayon niini.
Pagkahuman niini yanong nanglakaw ang mga mamumuno ug wala na hilabti pag-usab ang helper.
Ang mga ni respondi nga sakop sa kapulisan nisuway pa unta og hatud sa biktima sa Balamban District Hospital apan gideklarar nga dead on arrival na kini.
Gituohan sa kapulisan nga si Belda ra gyud ang tuyo sa mga killer ug padayon pa nila karong giimbestigar ang motibo sa krimen.(/EIM)(BANAT NEWS)