Way polis nga nagpabuto

CEBU, Philippines - Gitangtang na kagahapon sa buntag ang tapes nga gibutang sa mga sumbohan sa armas sa mga polis dinhi sa rehiyon pinangulohan sa Police Regional Office-7.

Si Supt. Louie Oppus, Deputy Regional Director for Operation (DRDO) sa Police Regional Office-7 ug ubang mga opisyal maoy nanangtang sa tape sa sumbohan sa armas sa mga sakop sa PRO.

Matud pa ni Oppus walay polis nagpabuto sa ilang service firearms atol sa pagsugat sa Bag-ong Tuig. Nasayran sa kinatibuk-an dinhi miabot og walo ka biktima sa stray bullet sa nakalabay’ng pagsugat sa Bag-ong Tuig.

Apan mipasabot si Oppus nga lisud kaayong pasanginlan ang mga pulis nga maoy nagpabuto sa ilang armas sanglit dili lang sila maoy adunay armas.

Ang mga hepe sa lungsod sa Minglanilla, Consolacion, Liloan, dakbayan sa Lapulapu ug Danao gipatubag sa PRO-7 human mapakyas pagduso og report kalabot sa mga nabiktima sa stray bullets gikan sa Disyembre 19 hangtud Enero uno base sa records sa Department of Health (DOH) Central Visayas

Sila si Supt. Rex Derilo, hepe sa Firearms Explosives Security Agency Guards and Supervision Section ug Sr. Supt. Erson Digal, hepe sa Regional Operation and Plans Division sa PRO-7 maoy gitahasan sa pagsuwat sa maong mga hepe aron patubagon sulod sa 24 oras kun ilaha nang madawat.

Si Derilo sa interbyu sa Banat News nagkanayon duha ka slugs sa stray bullets ang ilang ipaubos sa cross matching examination ug kun ugaling masuta nga lisensyado ang armas nga gigamit pagpabuto masubay nila kini sa PNP records. (BANAT NEWS)