CEBU, Philippines - Gihuwat pa ang Pasko ug iyang birthday, una pa mitahan kagahapon sa buntag sa buhatan sa Homicide Section sa Cebu City Police Office (CCPO) ang lalaking gitumbok nga nakapatay niadtong Disyembre 18 diha sa sitio Mangga sa barangay Tisa dakbayan sa Sugbu.
Si Roel Nacua, 33, taga sitio Kadasig Phase 2 sa naasoy’ng barangay misaysay sa Banat News nga misurender siya sa kapulisan aron iyang mabayran ang salaod nga iyang nahimo.
Siya maoy midunggab patay sa tuong liog ni Dandan Catampatan, 31, nagpuyo sa nahitaboan niadtong Disyembre 18 tungod sa ilang panaglalis sa hantakan.
Matud ni Nacua nga sa wala pa niya lubaa ang biktima nagpakalas siya niadtong higayona ug nakatigom na siya og P40 dihang kalit lang miabot ang biktima ug gikuha niini ang iyang ‘kalas’ apan P20 ray iyang gihatag apan mihulga pa kini ngadto kaniya.
Human niadto milakaw ang biktima ug pagbalik pa niini duna nay kuyog nga tulo ka mga lalaki.
“Naglain na akong huna-huna niadto kay nibahad man basin ako’y unhan, mao nga ako siyang gidunggab ang biktima, diri maigo,” matud pang Nacua nga mitudlo sa tuong liog diin niya gihansakan sa batanggas ang biktima. Gisuwayan pa unta pagdala ang biktima sa Cebu City Medical Center (CCMC) apan wala na kini makaabot pang buhi sa naasoy’ng tambalanan.
Si Teresita inahan ni Nacua nga mikuyog sa Homicide Section miasoy sa Banat News nga human nakapatay iyang anak iya kining gihangyo nga motahan apan mihangyo kini kaniya nga paabuton pa niini ang Pasko ug iyang birthday niadtong Disyembre 29 ug kagahapon siya mitahan.(/EIM)(BANAT NEWS)