CEBU, Philippines - Gipaabot sa Provincial Agriculture Office sa lalawigan sa Sugbo ang report gikan sa lungsod sa Balamban kalabot sa mga nadaot nga mga tanom nga humay ug mais gumikan sa baha mugna sa bagyong Sendong.
Matud pa ni Dr. Necias Vicoy Jr. ang Provincial Agriculturist sa lalawigan sa Sugbo nga ang maong report maoy basehan sa kagamhanan sa lalawigan sa ihatag niining hinabang ngadto sa apektadong mga mag-uuma.
Hinuon dili gyud direktang maggikan sa panudlanan sa Kapitolyo ang ihinabang sa mga nangadaot nga mga tanom, apan ang Philippine Crop Insurance Corporation (PCIC) maoy mobayad sa tanang danyos , sumala ni Vicoy.
Gani malaumon siya nga kun makompleto na ang mga dokumento mapahimuslan na sa mga mag-uuma ang insurance niini sa ilang mga tanum human nga nadaot gumikan sa baha ug bagyo.
Kahinumdoman nga may kapin na sa 10 mil ka mga mag-uuma ang nagpasiguro sa PCIC bunga sa paningkamot ni Governor Gwendolyn Garcia isip tipik ug kabahin sa iyang programa nga mao ang Integrated Farming System Development Program. (BANAT NEWS)