Isyu bahin sa Citicenter patun-an

CEBU, Philippines - Mihangyo ang konseho sa Siyudad sa Sugbo sa City Legal Office nga tun-an ang pagsupak sa kanhi tag-iya sa luna nga gitukoran sa Citicenter Commercial Complex kalabot sa plano sa dakbayan nga magtukod og condominium sa nahisgutang luna.

Sumala pa sa kanhi tag-iya sa maong area nga si Bal Falcone nga nagplano sila nga bawion pagbalik ang maong yuta nga gisakmit na sa kagamhanan sa Siyudad human kini isubasta og wala na malukat sa iyang mga tag-iya lapas sa “one-year redemption period.”

Giingong nasubasta gyud sa Siyudad ang maong luna gumikan kay ang tag-iya sa Citicenter wala makabayad sa ilang buhisanan nga miabot na og P9 milyones.

Si Falcone nagpadala og suwat ngadto kang Mayor Michael Rama ug miklaro nga aduna sila’y kasabotan ug sa mga opisyal sa barangay Kamagayan nga pagamiton sila og luna sa covered market ug magbutang sila’g playground nga walay bayad.

Giingong midonar usab si Falcone og yuta aron magamit nga access road gikan sa P. del Rosario paingon na sa Junquera nga mo-agi sa kadalanan sa Kamagayan.

Sumala pa ni Falcone nga ilang nasabotan nga ang Citicenter dili na magbayad og buhis gumikan sa ilang mga kasabotan. Gikataho nga angayan untang makigsabot si Falcone kaniadto sa mga opisyales sa siyudad ug dili sa barangay aron mahimoan gyud og klaro nga kasabotan.

Ang maong sitwasyon gitakdang tun-an pa sa City Legal Office. (BANAT NEWS)