CEBU, Philippines - Gidayeg sa pangulo sa Nagkahiusang Drayber sa Sugbo (NADSU) nga si Roy Opura ang paglig-on sa konseho sa Siyudad sa Sugbo sa usa ka ordinansa nga nagdili sa pagpanaygon sulod sa mga sakynang pasaheroan ning dakbayan sa Sugbo.
Ang maong ordinansa wala itumong sa panahon lamang sa Pasko kay ipatuman kini sa tibuok tuig gumikan sa mga kasayoran nga may mga tawo gihapong manaygon gihapon sa sulod sa mga PUJ bisan walay okasyon.
Nagkanayon si Opura nga nakahasol kaayo sa mga pasahero ang mga manaygonay gumikan kay ang uban niini manglingkod gyud sa lingkoranan hinungdan nga ang ubang mga pasahero mangahadlok gumikan kay pugson man sila sa paghatag og kuwarta.
Gumikan kay ang maong mananaygon magbabag man ang uban sa pultahan sa jeep maglisud na sa pagsaka o pagkanaog ang mga pasahero niini.
Samtang usa ka pasahero nga si Nivram Cabunello ang nahinabi dinhi sa Banat News kagahapon ug misaysay nga samok gayud kaayo ang mga manaygonay sulod sa sakyanan gani adunay uban niini ang masuko kung dili tagaan og kuwarta.
“ Makahadlok kaayo nang mga manaygonay labi na kanang mga batan-ong lalaki, mura man og mga tulisan og dagway. Basin pasangil-pasangil lang nga manaygon unya manulis diay,” sumala pa ni Cabunello.
Naluoy usab si Cabunello sanglit adunay ubang mga drayber ang madakpan sa mga traffic enforcer ug makamulta og P1,200 gumikan kay mitugot sila nga kabyonan ang ilang mga sakyanan sa maong mananaygon.
Nasayran nga higpit nga gidili nga kabyonan ang mga sakyanan nga pasaheroan apan ang mga manaygonay mokalit lang og angkas nga dili mabantayan sa mga drayber.
Ang chairman sa committee on peace and order sa konseho nga si Konsehal Augustus Pe Jr. misaysay nga gitumong kini aron paglikay nga mahitabo ang aksidente.
Makamulta og P500,000 kadtong mga tawo nga makasupak sa maong kamandoan, sumala pa ni Pe. (BANATNEWS)