CEBU, Philippines - Gipahibalo ni Cebu 2nd District Congressman Pablo Garcia sa mga barangay kapitan sa lalawigan sa Sugbo nga hayan nga makabaton ang tanang barangay kapitan dinhi sa Pilipinas og retirement benefits.
Ang mao niyang pagpahibalo natigayon atol sa gipahigayon nga general assembly nga gihimo nga gitambongan sa liboan ka mga barangay kapitan dinhi sa Sugbo nga gipahigayon sa Cebu International Convention Center sa dakbayan sa Mandaue niadtong miaging adlaw.
Matud pa niya nga makatarunganon ug makiangayon lamang nga ang mga kapitan nga maoy sentro sa pagserbisyo sa gobiyerno makadawat sa maong benepisyo.
Dugang pa niya nga ang maong balaudnon nga iyang gipangamahanan anaa na sa committee on local government sa Kongreso ug dako ang iyang pagtuo nga hingpit kining kaaprobahan sanglit walay mipakita og mga pagsupak niini.
Si Garcia miingon nga ang mga barangay kapitan nagserbisyo usab sa publiko maong kinahanglang mahatagan usab sila og retirement benefits sama sa ubang opisyales sa gobiyerno.
Dugang pa niya nga dili mahidangat ang mga programa ug proyekto sa gobiyerno gikan sa kagamhanan kun dili pa ang mga barangay kapitan nga maoy gihimong sandiganan sa pagpatuman niini. (BANATNEWS)