CEBU, Philippines - Bisan pa sa mga pagsuway ug ngil-ad nga mga panghitabo nga misugat sa kalibutan karon nga nagsingabot na ang Pasko, si Cebu Archbishop Jose Palma miawhag sa mga Sugbuanon nga magmalipayon sa kasaulogan sa adlaw’ng natawhan ni Hesu Kristo.
Si Palma mipahigayon sa labing unang Misa De Gallo niya kagahapon didto sa chapel sa Archbishop Palace mipadayag sa iyang kalipay sa pagsaulog sa labing una usab niyang Pasko isip Archbishop sa Sugbo.
“Niining una gayod nga higayon…niining una gayod nako nga Pasko sa Sugbo… nga nakighimamat ako kaninyo, isip inyong Arsobispo, bisan dili takos…nagpasalamat ako og dako uyamot sa Dios tungod sa gitagal niya nga lain na usab nga panahon sa pag-ayo, panahon sa kalipay ug panahon sa gugma,” matud pa ni Palma.
Gitambagan ni Palma ang mga katolikong Sugbuanon nga ipadaplin una ang mga kaguol ug suliran ug mosuway luwas nga paglipay-lipay karong Pasko.
“Bisan taliwala sa mga makapasubo nga panghitabo sa kagamhanan ug sa Simbahan, bisan atubangan sa mga suliran nga nakasamok sa katawhan, akong gipanghinaot nga magpabilin kitang malipayon ug malinawon.”
Dugang pa ni Palma nga dili angay kalimtan nga ang Pasko panahon usab aron paggahin og oras alang sa pamilya ug sa pag-ampo. (BANATNEWS)