Sendong nakapatanggong sa kaliboan sa mga pasahero

CEBU, Philippines - Nahimo na usab nga suba ang ubay-ubay nga mga karsada ning dakbayan kagahapon sa hapon human mobundak og kalit ang kusog kaayong uwan.

Nanglangoy ang mga sakyanan ug kagatosan usab nga pedestrian kinsa miubog sa taga-paa nga gilawmon sa tubig baha bunga sa bagyong Sendong nga mipisik sa iyang uwan dinhi sa Sugbo.

Gumikan sa maong bagyo kaliboan ang    mga biyahedor   nga nabara ug natanggong sa mga pantalan dinhi sa Sugbo ug kasikbit nga mga lugar gumikan sa pagsuspenso sa Philippine Coast Guard sa operasyon sa mga barko sa nagkalainlaing rota sa Kabisay-an, Mindanao ug Luzon.

Ang bagyong Sendong gituohang mahimutang sa southwest sa Dipolog City karong buntag (Sabado) ug gilauman usab nga sa Domingo mogawas na kini sa Pilipinas.

Si Boy Artiaga sa PAG-ASA Mactan nagkanayon nga si Sendong may gikusgong hangin nga 75 ngadto sa 90 kilometros matag takna ug 10 ngadto sa 25 ka millimetro ang gidaghanon sa uwan matag takna sa gilapdong 400 kilometros ang apektado niini.

Ang Central Visayas dili apektado ni Sendong apan makasinati kini og mga panag-om ug uwan.

Ang kadagatan baluron   nga mosaka ngadto sa 4 ngadto sa 5 ang gitas-on sa matag bawod ug delikado sa mga sakyanan sa dagat nga mobiyahe.

Matud ni Artiaga nga sa ulahing weather bulletin kagahapon sa alas 10:00 sa buntag ang mga lugar nga gipaubos sa signal number 2 mao ang Southern Leyte, Bohol, Southern Cebu, Southern Negros, isla sa Siquijor, Surigao Del Norte, Siargao Island, Surigao Del Sur, Dinagat province, mga probinsiya sa Agusan, Davao Del Norte, Davao Oriental, Samal Island, mga probinsiya sa Lanao, probinsiya sa Misamiz, mga probinsiya sa Zamboanga, Northern Cotabato, Compostela Valley, Bukidnon, Camiguin ug Maguindanao.

Ang mga lugar nga ubos sa signal number 1 mao ang Palawan, Cuyo Island, Eastern Samar, Western Samar, Northern Leyte, Northern Cebu, Northern Negros, Iloilo, Capiz, Antique, Aklan, Guimaras province, Davao Del Sur, Sultan Kudarat, South Cotabato, Sarangani province ug probinsiya sa Basilan.

Base sa report ang Philippine Coast Guard (PCG) gikanselar ang tanang biyahe sa barko gikan dinhi ug ang paingon   nganhi sa Sugbo. (WC)(BANAT NEWS)