CEBU, Philippines - Nagutay-gutay ang lawas sa 66 anyos nga lolo ug uyo-an sa usa ka konsehal sa lungsod human kini malatayi sa ligid sa prime mover nga “hit and run” didto sa barangay Tuyan siyudad sa Naga alas 9:10 niadtong Martes sa gabii.
Ang biktima nailhan nga si Tom Maris Jr, 66, minyo, nagpuyo sa barangay Inoburan, siyudad sa Naga ug uyoan ni konsehal Emie Matis Gabito sa lungsod sa Madridejos kinsa kawani sa Bantay Radyo.
Samtang ang nakaligis sa biktima mao ang prime mover nga adunay plaka nga GXG-551 nga gimaneho ni Fernando Bernabe, 44, minyo, nga taga barangay South Poblacion, lungsod sa San Fernando, nga gipanag-iya ni Joseph Beltran Ybanez nga taga Tres De Abril siyudad sa Sugbo.
Si SPO2 Ian Quitayen, chief of operation sa Naga City Police Station mibutyag sa Banat News nga ang biktima nanaygon sa mga kabalayan sa maong lugar dihang naligsan kini sa nagbaguros nga prime mover nga gikan sa siyudad sa Sugbo paingon sa dakbayan sa Toledo.
Matud pa sa mga saksi nga kalit lang milabang ang biktima busa wala na makontrolar sa drayber sa prime mover gumikan sa kakalit sa hitabo. Giangkon sa drayber atol sa pagsukit sukit sa kapolisan nga naapikihan na siya pagpreno sa sakyanan hinungdan nga naligsan gyud ang biktima ug nalatayan pa kini sa mga ligid sa atras sa maong prime mover.
Gihulagway sa kapolisan nga maayong pagkapigsat sa lawas sa biktima nga mibadlis ang mga lama sa dugo sa karsada samtang nagkatag sa karsada ang sulod sa ginahawa-an niini. “Napigsat gyud ni grabing pagkaligisa hasta ang kasing kasing nga nigawas apil ug kapigsat”, dugang ni SPO2 Quitayen.
Apan ang drayber sa prime mover wala gyud manumbaling ug mipasirit sa pagpadagan sa sakyanan apan maayo nalang kay nakuha ang plate number sa sakyanan sa kapolisan busa gi-radyohan dayon ang mga kapolisan sa sikbit nga lungsod.
Mga ala 1:00 na sa kaadlawon kagahapon hidakpi ang drayber pinaagi sa check-point didto na sa Lutopan, siyudad sa Toledo ug sila na maoy mitunol niini ngadto sa kapolisan sa Naga. (BANAT NEWS)