CEBU, Philippines - Misiaw na og maayo ang mga tulisan dinhi sa dakbayan sa Sugbu ug ning uwahi nabiktima ang usa ka nurse sa duha ka lalaking nagsakay og motorsiklo samtang nag-atang kini og masakyan kagahapon sa kaadlawon diha sa sitio Japer sa barangay Quiot siyudad sa Sugbu.
Ang biktima giilang si Rose Ann Quilaton, 20, nagpuyo sa maong lugar nga nakuhaan sa iyang traveling bag nga iyaha untang dad-on padulong sa kaulohan.
Apan kalit lang miabot ang usa ka motorsiklong kolor itom diin nakuha niya ang plate number niini nga 9896-GB nga gisakyan sa duha ka wala mailhing lalaki ug mihunong sa iyang tungod.
Ang backrider maoy mikanaog ug mition kaniya og wala matinong kalibre sa armas dayon gikuha ang iyang traveling bag nga gisudlan sa iyang cellphone, P4,500 cash ug ang mga dokumento sa iyang pagka nurse.
Human sa pagpanulis, ang biktima daling mitaho sa Pardo Police Station apan wala na maabti ang mga gikatahapan.
Gani gi-flash pa sa Pardo Police Station ngadto sa Mobile Patrol Group ang motorsiklo nga gisakyan sa duha ka tulisan apan wa maagi sa mga lugar diin nagpahigayon og blocking force. (BANAT NEWS)