CEBU, Philippines - Duna pay laing upat ka mga kauban ang duha ka lalaking gipasanginlang maoy mitulis ug mipusil patay sa teller sa M. Lhuillier sa dakbayan sa Toledo niadtong milabay’ng Biyernes.
Ang Provincial Intelligence Branch (PIB) midakop nila ni Christian Macapaz Purisima, 30, taga barangay Talavera ug Pablito Napoles, 32, taga barangay Cantuod sa lungsod sa Balamban sa managlahing lugar atol sa follow-up operation sa mga sakop sa PIB niadtong Sabado.
Si Purisima miangkon nga iya ang duha ka paketeng shabu ug usa ka .22 magnum revolver nga may buhing bala nga nakuha sa kapulisan gikan kaniya, samtang wala moangkon si Napoles sa granada apan iya ang duha ka .38 revolver ug usa ka .357 revolver. Si Supt. Rodulfo Albotra, hepe sa PIB nga nahinabi sa mga tigbalita nagkanayon nga usa ka grupo ang mga suspetsado nga ilang gimonitor diha sa dakbayan sa Toledo nga dunay kapabilidad nga manulis og dagkong mga negusyante nga ang usa niini ilang miyembro dili taga Cebu .
Apan giklaro ni Albotra nga ang usa nga wala pa madakpi dili taga Cebu. Napatay sa maong pagpanulis si Domingo Del Pilar, teller sa maong establisamento nga taga Pinamungahan kinsa maoy nagdala sa kwartang ilang gi-withdraw sa bangko.
Matud sa maong opisyal nga ilahang susihon og maayo ang tanang anggulo lakip na ang inside job.
Sumala pa ni Albotra nga usa sa duha nila ni Macapaz ug Napoles giila ug gitumbok sa mga saksi nga maoy mipusil kang Del Pilar.
“Actually unom ni sila ka buok apan dili pa ta kahatag og conclusive sa gidaghanon, mao ni subject sa among case build-up,” dugang pang Albotra.
Gihulagway niini nga walay gipili ang maong grupo basta ang ilang target adunay kwarta ug dili magpanuko nga mopatay og tawo.
Samtang si Supt. Henry Biñas, hepe sa Provincial Investigation and Detective Management Branch (PIDMB) nagkanayon nga ilahang pasakaan og kaso sila si Purisima ug Napoles base sa ilang nakuhang mga ebidensya.
Ang kapulisan sa dakbayan sa Toledo mao nay mopasaka batok nila og kasong robbery with homicide apan ang duha hugtanong mihimakak sa ilang kalambigitan sa maong pagpanulis.
Matud ni Purisima nga niadtong higayona didto ra siya sa ilang balay sa Talavera sanglit ang iyang asawa duha na ka semanang nabughat ug dili pa mahimong biyaan niya.
Samtang si Napoles kinsa nadakpan sa kapulisan didto sa Daruga 3 sa Lutopan, Toledo nagkanayon nga didto siya nadakpi sa balay sa iyang hinigugma niadtong higayona wala gyud sila molakaw. Nahibulong siya nganong gilambigit siya sa maong pagpanulis ug pagpatay sa usa ka kawani sa M. Lhuillier.
Hinuon giangkon ni Napoles nga duna siya’y record sa Balamban police station og kasong highway robbery apan nakagawas niadtong Hulyo niining tuiga human siya nakapiyansa og P40 mil. Si Napoles nadakpan uban kang Ronnie Dumdom human sila gipasanginlan sa nahitabong tulis diha sa Gaas, Balamban niadtong bulan sa Hunyo. (BANATNEWS)