Kanhi deputy CENTCOM Commander mao nay AFP Chief

CEBU, Philippines - Sugod karong adlawa molingkod na isip Chief of Staff sa Armed Forces of the Philippines ang kanhi deputy commander sa Central Command nga si Lt. Gen. Jessie Dellosa human gitudlo ni Presidente Benigno Aquino III nga hulip kang Gen. Eduardo Oban Jr. kinsa gikatakda nang moretiro karong adlawa.

Ang turn over ceremony anha buhaton sa Camp Aguinaldo, Quezon City sa buntag. Si Dellosa kanhi commanding general sa Northern Luzon Command, Camp Aquino, Tarlac City.

Niadtong milabay’ng semana, si Dellosa maoy usa sa mga nagranggo og lieutenant general nga nabutang sa talaan sa mga kandidato sa pagka chief of staff nga gisumitir sa Board of Generals ngadto ni Aquino.

Si Dellosa gipanganak sa Bacon, Sorsogon ug anak sa usa ka sundalo nga beterano sa Korean war nga kauban kaniadto ni kanhi presidente Fidel V. Ramos dihang tenyente pa ang naulahi.

Nasulod sa Philippine Military Academy sa edad nga 18 niadtong 1975 ug mitapos niadtong 1979. Nadestino siya sa Sulu, Basilan ug nasamdan makaduha ka higayon sa giyera batok sa Moro National Liberation Front.

Siya nahatagan og PMA cavalier Award for Military Operations sa PMAAAI niadtong 1988. Nahimo siyang Deputy Task Force Commander and Operation Officer of Joint Task Force (COMET) sa paggukod sa Abu Sayyaf nga miresulta sa kamatayon ni Abu Sabaya ug naluwas ang magtiayong Burnham couple sa Sirawai, Zamboanga del Norte.

Si Engr. James Dellosa, ang igsuon sa heneral nga gikahinabi sa The Freeman nga walay kalainan ang liderato sa iyang igsuon sa liderato ni Aquino ug makabenepisyo og maayo ang mga sakop sa AFP sa mga housing and education programs ug uban pa.

“The role of my brother is the same as PNoy’s, there will be no anomaly at hindi rin niya ugali ang nakikisali sa politics,” matud pa niini.

Ang PMA Class of 1979, nailang kaalyado sa gi-hospital arrest nga si kanhi presidente ug karon Pampanga Rep. Gloria Macapagal-Arroyo. Apan kini mipasalig nga dili sila mosuway nga guboton pinaagi sa destabilisasyon ang kasamtangang gobiyerno. (BANAT NEWS)