Festival of lights sa Naga gibuksan

CEBU, Philippines - Gibuksan na sa milabay’ng gabii ang Festival of Lights sa dakbayan sa Naga nga gipanindot pa og maayo pinaagi sa walo ka minutos nga fireworks display ug pagpalupad sa mga sky lantern.

Ang maong kalihukan gisaksihan kini sa liboang mga residente sa siyudad nga personal nga gipangulohan ni Mayor Valdemar Chiong.

Ang maong tradisyon nagsugod niadto pang tuig 1998 dihang ang igsuon sa mayor nga si anhing Ferdinand Chiong mao pay mayor sa Naga kaniadto.

Matud ni Valdemar nga ang maong kasaulogan gipahinungod kini sa mga malupyo sa dakbayan sa Naga sa pagsaulog sa Pasko.

“The putting up of Christmas fair in Naga is to bring in the Christmas atmosphere here. Bisa’g wa kay kwarta, mosuroy ka diri bisag mokaon lang ka’g mani, ug motan-aw ka sa lights, malipay naka. That was why Enan and I conceptualized this project,” ni Valdemar pa.

Matud ni Valdemar nga gipili nila ang Disyembre 8 nga adlaw sa Imaculada Concepcion aron ang mga tawo nga mouban sa prosesyon makasaksi usab sa kalihukan sa festival of lights.

Mga alas 7:29 sa gabii niadtong Huwebes human sa gipahigayong prosesyon sa imahen sa Imaculada Concepcion nga gipangulohan ni Padre Melchor Urjel mihunong una sila diha sa Saint Francis Of Assisi Plaza sa gipahigayong countdown nga gipangulohan sa Mayor sa pagpasiga sa multi-colored lights nga gitaod diha sa mga kahoy, nativity scenes ug Christmas trees sa palibot sa plaza.

Human sa pagpasiga sa mga suga gisunod dayon og palupad ang mga sky lantern ug ang fireworks.

Ang mayor midugang nga ang Festival of Lights nga gisalmutan sa nagkalain-laing establisamento sa siyudad molungtad kini hangtud sa Enero sunod tuig. (BANATNEWS)