Drugs gikan city jail ipaimbestigar sa BJMP

CEBU, Philippines - Mimando na ang Bureau of Jail Management and Penology (BJMP)-7 ngadto sa kadagkuan sa Cebu City Jail paghimo og imbestigasyon sa report nga nagikan sa maong bilanggoan ang tinubdan sa ginadiling drugas nga ibaligya sa gawas.

Si Sawaib Magondacan Sultan, 28, taga dakbayan sa Talisay ug lumad nga taga Marawi City nasikop sa mga sakop sa Provincial Intelligence Branch (PIB) niadtong miaging hapon sa usa ka mall sa north reclamation area ug nakuhaan og lima ka bultong shabu.

Apan nakurat ang mga imbestigador dihang kini mibutyag nga ang shabu nga iyang gipamaligya gikan sa sulod sa usa ka binilanggo diha sa Cebu City Jail.

Matud ni Insp. Manuel Dela Peña, Deputy Jailwarden sa Cebu City Jail mitug-an sa Banat News nga nakadawat na sila og kamanduan gikan ni BJMP-7 director Romeo Vio paghimo og imbestigasyon sa maong report.

Si Dela Peña dako ang pagduda sa maong pamahayag sa suspek tungod sa kahigpit sa seguridad nga ilang gipatuman ug maglisod ang pagpasulod og shabu ug labaw nang lisod ang pagpagawas niini.

Natahap hinuon si Dela Peña nga posibleng gi-divert lang sa dinakpan ang atensyon sa kapulisan ngadto sa CCJ aron dili na kini sukit- sukiton pa og maayo sa iyang tinuoray nga tinubdan.

Apan bisan pa niini gipasalig ni Dela Peña ilahang imbestigahan ang maong report.

Giangkon niya nga lisud gyud ang pag-monitor sa ipayuhot nga shabu gikan sa gawas tungod sa kakuwang nila og kagamitan apan bisan pa niini gihulagway niya nga pabiling normal ug kontrolado nila ang kalihukan sulod sa bilanggoan.

Dugang niya nga wala makaapektar nila ang maong report ug gani nakadasig pa kini ngadto nila aron mas pahugtan pa ang ilang pagpaniid sa mga inmates.

Pagkakarun ang maong bilanggoan dunay 2,016 ka mga piniriso ug duna lay 139 ka mga jailguards nga nagbantay apil na silang mga opisyal. (BANATNEWS)