Buloy: Bay Toy ngilngiga tong akong Lolo, gidakop sa mga hapon gipapili sa duha ka klase nga silot. Gipauna niya og pili iyang kauban, a buhi siya.
Bitoy: Mga katsila pay nakadakop ana niya patay na siya.
Buloy: Ngano man?
Bitoy: Akong Lolo gidakop sa mga katsila. Gipapili sab og duha ka silot DS ug DP gipauna niyag pili iyang kauban nipili og DS patay.
Buloy: Unsa man diay nang DS?
Bitoy: Death Sentence.
Buloy: Sa ato pa DP gipili sa imong Lolo? Buhi gyud.
Bitoy: Patay gihapon.
Buloy: Unsa man diay nang DP?
Bitoy: Death Penalty.(Toink!/Aguy)
Hehehehehehehehehehe
Bisan sa kabug-at sa kaso nga giatubang sa laing pinoy nga gisilotan og kamatayon sa nasud sa China, walay Pilipino nga dili mobati.
Duna may wala makauyon sa pagpanghilabot sa Kagamhanang Aquino sa balaod sa China daghan sab ang nasagmuyo nganong kung duna may tinguha ang Kagamhanang Nasyonal paghangyo sa mga nasud nga mosilot og kamatayon sa mga Pinoy diha naman mohimo og aksiyon kun ipakanaug na ang hukom.
Usa ka tigpaminawan sa DYAB Abante pa Bisaya mihimo og sanglitanan sa pag-ingon “Una pa modagan pagpalit og bugas kun magbukal na ang tubig”.(Toink!)
Bitoy: Tay dag-om man magkuha tag payong.
Tatay: Ay sus dag-om ra na.
Bitoy: Tay niuwan na.
Tatay: Dagan pagdali pagkuha og payong kay mabasa ta.(Ayay!) Hehehehehehe!
Ugaling pinoy ba ito? Aminin………..
Kun nganong lisod nang tuison ang hukom sa China taliwa sa usa ka nasudnong hangyo nga girepresentahan sa atong pangulo ang akong kinabus nga panahom, Ligdong ug dogokan ang sistema sa hustisya sa Nasud sa China.
Buot man natong luwason ang kinabuhi sa atong igsoong Pinoy dili mabasol ang pagpangagot sa ngipon sa mga tsino sa dakong kadaot sa ginadiling drugas nga gipayuhot sa ilang nasud. Kadaot og kaalaotan nga sa atong tugkaran mismo atong nasaksihan.
Ang labing sakit nga kamatuoran kay nahimong kolateral ang ubang mga Pinoy nga igo lang nanginabuhi sa gawas sa nasud apan nabiktima sa mga lampingasan.
Sa labing uwahing ihap dunay 208 ka mga Pinoy nga natanggong sa bilanggoan sa China. 70 sa mga kaso dunay sentensiya sa kamatayon uban sa 2 ka tuig nga kahigayonang mausab.
45 nasentensiyahan og tibuok kinabuhing pagkabilanggo samtang 80 ka mga kaso ang dunay mga tagal. Magpaabot pa ba ang gobiyerno nga iphan na og pila ka adlaw sa bitay ang mga akusado una pa magkisikisi paglihok ang kagamhanan?
Dili man makapangyugpos ang gobiyerno apan ang kamatuoran sa matag kalamposan nga mahimo magbawon kini og mas dakong peligro.
(emailad:jomar_bellita@yahoo.com.)