CEBU, Philippines - Samtang ang ubang mga fraternities nalambigit og mga kagubot ug krimen sa katilingban diay usa ka grupo nga pokus sa katuyoan sa ilang pagkatukod ilabi na sa panahon sa kapaskuhan nga panahon sa paghinatagay.
Ang Alpha Sigma Omega-Sigma Chi Gamma International Collegiate Service Fraternity and Sorority ug ang mga alumni niini nga mao ang Grand SIOUX Alumni Council (GSAC) pinangulohan ni Sherwin Cal subling nanghatag og mga tsinelas alang sa mga kabus nga kabataan.
Sama sa milabay’ng tuig, ang SIOUX (maoy tawag sa mga sakop sa maong fraternity) nakig-partner sa The Freeman pinaagi sa ilang The Freeman Foundation nga adunay tinuig nga children’s christmas party alang sa mga kabus nga kabataan dinhi sa Sugbu ug sa ubang bahin sa Central Visayas.
Ang SIOUX, usa ka service oriented fraternity adunay gihan-ay nga mga proyekto matag tuig alang sa komunidad ug usa na niini ang “Tsinelas alang kang Dodong ug Inday” project nga anaa na sa ikaduhang tuig.
Tumong sa grupo nga makahatag bisan gamay’ng kalipay sa kabataang kabus. Kini bisan paman sa kahagip-ot sa panalapi bunga sa ekonomikanhong kakulian karon dili ikalimod nga ang tagsa-tagsa ka miyembro sa komunidad adunay responsibilidad nga tabangan ang uban.
Si Mr. Melandro “Bhoy” Mendoza, ang general manager sa The Freeman ug Banat News kinsa usa sa mga labaw sa The Freeman Foundation maoy midawat sa 163 ka paresang tsinelas alang sa 7-anyos ngadto na sa 12-anyos ug mipadayag sa iyang kalipay ug pasalamat sa maong donasyon.
Atol sa simpleng turnover ceremony diha sa Miguel G. Belmonte Hall sa Philstar Building si Mendoza gipahibalo sa SIOUX sa intensyon niining himuon na kining tinuig nga kaakohan sa grupo ug misaad nga tabangang sa ubang mga proyekto ang The Freeman Foundation.
“Mas mabuti yung ganun kase malaking tulong ito sa foundation,” matud pang Mendoza.
Ang SIOUX sa nanglabay’ng mga kalamidad nakapaambit sad og tabang sama sa mga biktima sa Bagyong Ondoy didto sa Luzon ug sa mga nabiktima sa sunog sa Metro Cebu sa nanglabay’ng mga tuig. (BANAT NEWS)