Task force naniid sa mga tigpayuhot og isdang binuthan

CEBU, Philippines - Gitun-an sa mga tinugyanan sa Cebu Provincial Anti-Illegal Fishing Task Force (CPAFTF) ang bag-ong estratehiya batok sa mga negosyante nga padayong nagpalusot og mga isdang pinabuthan.

Kini mao ang pagsikop sa mga vendor og isda sa kamerkadohan sa kalungsoran sa amihanan kinsa maoy modawat sa mga baligyang pinabuthang isda.

Ang team leader sa Team Eskina Monitoring Group (TEMG) sa CPAFTF nga si Engr. Oscar Barcenas nagkanayon nga nasakpan na nila karon ang mga paagi sa mga negosyante og pinabuthang isda nga imbis moderetso sa pagtumod sa ilang mga baligya ngadto sa Pasil Fish market sa dakbayan sa Sugbo, adto na nila kini ihandos sa mga kamerkadohan sa amihanang kalungsoran sa lalawigan.

Kini mao ang mga lungsod sa San Remegio, Tabuelan, Tuburan ug Dumanjug. Karong nasayran na sa grupo, mipasidaan si Barcenas nga sa dili madugay  ilakip na nila pagpasaka og kaso kadtong mga negosyante sa kalungsoran nga nakig-alayon sa mga negosyante niining pinabuthang isda aron sila mapriso. Matud pa ni Barcenas nga migamit ang maong mga negosyante niining sakyanan nga gitawag nilang “kagang”.

Motorsiklo kini nga dili tawo ang karga kundi mga pinabuthang isda nga ibutang sa mga sudlanan nga igaid sa matag kilid sa motorsiklo nga mura usab og magkinagang ang sakyanan.

Mao kini mobiyahe ngadto sa nahisgotang mga lungsod busa lisud na silang hisakpan sa mga mananakop.

Apan matud pa ni Barcenas nga sisiw ra kaayo kining planoha kay ang mga sakop sa CPAFTF mat-an pa sa pukot nga sayon kaayong makapaniid sa mga binuang sa mapahimuslanong negosyante.   Miingon si Barcenas nga inihap nalang ang mga adlaw sa maong mga negosyante nga gahi og ulo kinsa kalipay nila ang pagsupak sa balaod nga gipatuman sa kagamhanan.

Ang higpit nga pagsumpo sa illegal fishing  maoy kasamtangang kampanya ni Gobernador Gwendolyn Garcia ug kinahanglang matuman kini pinaagi sa pagpriso sa mga mamaligyaay og pinabuthang isda aron nga wala nay mamalit sa mga isda nga makuha pinaagi sa dinamita.  (BANATNEWS)