CEBU, Philippines - Lima ka tawo ang naangol human mobalitok ang trak de karga nga ilang gisakyan kay nadasmagan og laing sakyanan didto sa ilawom sa flyover sa dalan Governor Cuenco dapit sa Foodland sa barangay Banilad dakbayan sa Sugbo sa miaging gabii.
Ang mga naangol mao sila si Isidro Cusil, taga Sta. Theresa, barangay Tisa ug maoy driver sa Mitsubishi Canter nga nagtangag sa plakang YHX-108, Juanito Montañez,30, taga Katipunan, Alma Sequera, 49, taga Basak siyudad sa Sugbo, Glendel Son, 18, taga Balamban, Johnden Arona, 21, taga Katipunan ug Gerry Macasero, 33.
Samtang ang nakadasmag kanila mao ang usa ka Toyota Sedan nga nagtangag sa plakang GDM-857 nga gimaneho ni Melio Lopez, 64, nagpuyo sa Maria Luisa Subdvision.
Si SPO3 Breman Budiongan sa Traffic Division nga nahinabi sa Banat News nagkanayon nga gikan sa Maria Luisa Village si Lopez ug pag-abot niini sa ilawom sa flyover iyang nabanggaan ang trak de karga.
Tungod sa kakusog sa pagkadasmag mitakilid ang trak de karga samtang ang mga sakay niini nangalagpot sa karsada lakip na ang ilang mga kahimanan sa catering services.
Gibana-bana nga may gilay-ong 2 metros ang nalagpotan usab sa de karga gumikan sa kakusog sa maong pagdasmag.
Matud ni Budiongan gikan pa sa ilang function house sa Talamban ang mga biktima dihang paingon na kining mamauli sa ilang tagsa-tagsa ka pinuy-anan. Ang mga biktima daling gihatud ngadto sa Cebu City Medical Center (CCMC).
Samtang ang duha ka driver gipugngan pa sa kapolisan alang sa dugang imbistigasyon.(/WC) (BANATNEWS)