CEBU, Philippines - Gibutyag sa hepe sa Cebu City Anti-Mendicancy Task Force (CCAMTF) nga si Isabelita Ganub nga hugot ang ilang pag-monitor karon sa kadalanan human nila masayri nga duna’y mga tawo gikan sa laing lugar ang nangabot dinhi sa Sugbo aron manglimos sa kadalanan.
Sumala pa ni Ganub nga moabot ngadto dul-an sa 40 ka mga tawo nga naggikan sa Jolo, Cotabato ug ubang parte sa Mindanao ang ilang nahibaw-an nga mituyo og anhi dinhi sa Sugbo aron diri mamasko pinaagi sa pagpanglimos ug giingong mangistar unta sila dinhi hangtud na sa Sinulog.
Nagkanayon si Ganub nga ila na nga gipadangat sa National Commission on Indigenous People (NCIP) ang maong suliran.
Dugang pa niya nga igo ra siya mopatuman sa anti-mendicancy ordinance sa siyudad busa hangyo niya sa publiko nga dili hatagan ang makililimos sa kadalanan aron dili kini manganad.
“Ang ubang makililimos kay kusog kaayo manglipat kung manuroy mi sa dalan. Kung naa gani among mga tawo, manago dayon na sila,” matud pa ni Ganub.
Sumala pa nga kasagaran sa makililimos dinhi mga dayo ilabi na panahon sa Pasko. Nagpatabang na karon si Ganub sa mga opisyales sa barangay nga motabang sa pagsita sa mga makililimos sa kadalanan.