CEBU, Philippines - Hugot nga gibantayan karon ang mga electrical ug electronic devices sa sulod sa matag buhatan sa Kapitolyo aron dili na masubli ang nahitabong sunog sa Provincial Assessor’s Office niadtong Miyerkules.
Ang mipagawas sa maong kamandoan mao si Provincial Administrator Eduardo Habin nunot sa ilang pagpagawas og memorandum alang sa tanang mga department head sa Kapitolyo nga nagpahimangno nga monitoron ang tanang mga elektrikal nga gamit sa matag buhatan. Sa maong kamandoan si Habin nagkanayon nga kinahanglan nga pawngon ug ibton gyud gikan sa outlet ang mga plug sa electrical ug electronic nga mga butang sulod sa matag opisina lapas sa alas 5:00 sa hapon o sa dili pa sirhan ang opisina human sa oras tingtrabaho.
Nagtuo si Habin sa maong paagi may kasiguroan na ang nahitabong sunog sa Provincial Assessor's Office tungod sa electrical short circuit dili na gyud mahitabo pa sa mga buhatan sa Kapitolyo. (BANAT NEWS)