CEBU, Philippines - Kritikal ang kahimtang sa usa ka 54-anyos nga ex-convict human kini pusila sa laing ex-convict didto sa sitio San Antonio, barangay Linao, dakbayan sa Talisay sa miaging Biyernes sa gabii.
Ang biktima giila sa mga polis nga si Victoriano Barliso, hingkod, nga nagpuyo sa maong lugar, samtang ang suspetsado mao usab si Boy Restauro, hingkod ug silingan sa biktima.
Si SPO1 Mikie Espina ug PO2 Stephen Sefuesca kinsa maoy miresponde sa maong hitabo mibutyag sa Banat News nga si Barliso ug Restauro pulos napriso sa Talisay City Jail kaniadto tungod sa kasong pagpatay.
Matud ni Espina gisentensyahan og 12 ka tuig nga pagkabilanggo si Barliso tungod sa sala nga iyang nabuhat.
Sa imbestigasyon sa nahisgutang mga polis nasayran nga si Barliso kinsa buwag sa asawa, paryente sa kapuyo ni Restauro.
Apan si Restauro magselos kuno kung ang iyang kapuyo moadto sa balay ni Barliso aron mosuroy lang ug makig-istorya sa biktima.
Matud usab ni Espina nga sa nahipos usab nilang report si Barliso giingong manggakos kini kung mahubog ug kaniadto nakita ni Restauro nga gigakos sa biktima ang iyang kapuyo dihang nahubog kini hinungdan nga misamot og ulbo ang selos sa suspetsado.
Sa wala pa mahitabo ang pagpamusil si Barliso ug si Restauro ang nagkalalis tungod sa selos.
Niadtong higayona si Restauro giingong nagdala og pusil ug dihang miinit na ang panaglalis iyang gipusil ang biktima. Human mahagba sa yuta si Barliso misirit usab dayon pahilayo sa maong lugar si Restauro ug karon padayon kining gipangita sa kapolisan.
Ang biktima kinsa samdan sa walang bahin sa dughan kasamtangang gitambalan sa Vicente Sotto Memorial Medical Center sa dakbayan sa Sugbo. (/WC) (BANAT NEWS)