Pugante sa CPDRC ipa-'shoot to kill'

CEBU, Philippines - Usa ka “shoot to kill order” ang mando nga gipagawas sa hepe sa prisohan sa lalawigan batok sa puganteng si Jojo Gañalon.

Matud pa ni Jail Warden Algier Comendador sa Cebu Provincial Rehabilitation Center (CPDRC) nga kun mosukol si Gañolon sa mga polis nga mosikop kaniya kinahanglang ipapusil kini.

Si Gañolon nakaikyas human sa hearing sa iyang kaso didto sa korte niadtong miaging Lunes.

Matud pa ni Comendador nga gawas lang kun magtinarong si Gañolon sa pagtahan sa iyang kaugalingon o kaha dili mosukol sa panahong may mga otoridad nga mosikop kaniya pagbalik, dili siya mahiagom sa hinanaling kamatayon.

Si Comendador miingon nga ang maong kamandoan gikan sa iyang buhatan iyang gisangon ngadto sa iyang mga sakop ingon man usab ngadto sa mga kapolisan sa kalungsoran sa lalawigan sa Sugbo kinsa padayong nagpangita karon kang Gañolon.

Subay niini, si Comendador miawhag kang Gañolon nga mangita og mga lokal nga opisyal o kaha mga opisyal sa barangay aron adto siya mosurender.

Kini tungod kay pangitaon gyud siya sa mga otoridad ug posibling maposilan siya kun magpadayon sa pagtagotago ug magdumili sa pagtahan sa iyang kaugalingon.

Gitug-an usab sa warden nga dili tiaw ang kasong gi-atubang ni Gañolon kay gawas sa kasong illegal drugs sa RTC Argao, aduna pa usab kini kasong giatubang didto sa lungsod sa Dalaguete.   - BANAT NEWS