CEBU, Philippines - Usa ka lalaking gikatahapang tulisan ang nagtingkagol sa Talisay City detention cell human kini masikop niadtong Martes sa hapon diha sa barangay Candulawan, dakbayan sa Talisay sa kapolisan ug mga opisyal sa barangay tungod sa paghupot niini og armas ug mga bala.
Ang nasikop mao si Jiovanie Dela Cerna, 33, nagpuyo sa maong dapit mag-atubang og kasong illegal possession of firearms human makuhai og bag nga may sulod nga kalibre .45 nga pistola, duha ka magazine sa maong armas ug 21 ka mga bala niini.
Si Inspector Hugo Rio Ipong uban ni PO3 Rey Bucao ug PO2 Roy Lofranco ubos sa pag-ayuda sa kapitan sa barangay nga si Virgilio Bacalso ug kagawad nga sila si Adolfo Torregosa ug mga tanod nga sila si Terencio Abendan, Floriano Abellana ug Dario Bacalso maoy misikop sa suspetsado.
Si Ipong nga nahinabi sa Banat News nagkanayon nga duna sila’y nadawat nga report kabahin sa usa ka armadong tawo nga gituohang tulisan diha sa lugar hinungdan nga giadto nila ang lugar uban sa mga barangay officials ug gipanid-an kini ug gidakop.
Matud ni Ipong nga duna sila’y nadawat nga report nga si Dela Cerna nalambigit sa mga insidente sa pagpanulis diha sa mga silingang siyudad ug lungsod sa Talisay. (BANAT NEWS)