Job order nga drug pusher sa city hall tiklo

CEBU, Philippines - Usa ka job order sa Talisay City hall kinsa sa samang higayon drug pusher nasikop sa kapolisan nga mironda sa balay niini didto sa sitio Rattan, barangay Tanke, dakbayan sa Talisay kagahapon sa buntag.

Ang nasikop mao si Rynyl Juezan, 32, nagpuyo sa maong dapit ug ubos kini sa   Civil Security Unit nga bahin   sa quota ni Konsehal Eduardo Gullas III.

Hinuon kasamtangan kining wala motrabaho samtang nagpaabot nga ma-renew ang iyang kontrata isip casual nga empleyado sa kagamhanan sa maong dakbayan ug gipaabot nga sa Disyembre 2, 2011 pa siya makabalik sa iyang trabaho.

Si Juezan miangkon nga niadtong tuig 2008 nadakpan siya sa kaso nga paglapas sa Akta Republika 9165 kon “Comprehensive Dangerous Drugs Act Law”.

Ang iyang kapuyo nga si Cleofe Racaza nadakpan usab sa susamang kalapasan niadtong tuig 2007.

Matud ni Juezan nga nakapiyansa sila busa gihatagan sila og temporaryong kagawasan.

Sayo niini sila si Supt. Eddie Recamara, hepe sa Talisay City Police Station uban ni Inspector Hugo Rio Ipong, PO2 Oliver Ortega ug PO1 Euwen Pitogo nagdala og search warrant   nga giluwat ni Regional Trial Court (RTC) Judge Enriqueta Loquillo-Belarmino sa Branch 57 sa ilang gilusad nga pagpangronda.

Nakuha sa mga polis gikan sa balay ni Juezan ang pito ka gagmay’ng paketeng shabu, usa ka empty medium nga plastik nga pakete, mga gitabas-tabas nga mga gagmay’ng plastic nga gituohang pustanan sa shabu, tulo ka mga lighter ug usa ka sim card.

Apan ang 13-anyos nga batang lalaki nga kamagwangang anak ni Juezan mipasangil kang PO2 Ortega nga misulod sa ilang balay nga wala pa moabot ang mga witness ug nagbitbit kini og pusporo nga gisulod sa hunos diin ma-recover ang mga ginadiling drugas.

Si Recamara sa iyang bahin, nagkanayon nga nagpahigayon sila og “test buy” batok kang Juezan ug gipanid-an nila kini sulod sa duha ka semana una pa sila mo-apply og search warrant batok sa suspetsado.

Dihang miabot ang mga polis si Juezan ug ang ig-agaw niini naabtan sa sulod sa balay apan daling nanagan ug maayo nalang kay nasignit ni Recamara si Juezan. (WC)(BANAT NEWS)