P100 mil kantidad sa mga piyesang gikawat

CEBU, Philippines - Dul-an P100 mil   ang balor sa mga piyesa sa sakyanan ang nasakiyo sa wala hiilhing kawatan gikan sa balay sa usa ka negosyante nga gilungkab didto sa S. Osmeña Street., barangay Poblacion siyudad sa Toledo niadtong Biyernes sa gabii.

Ang biktima mao si Aproniano Pansoy, 63, minyo, ug usa ka negosyante nga nagpuyo sa maong lugar.

Unom ka mga batan-on nga nag-edad og 12, 13, ug 14 ang gisikop sa kapolisan aron imbistigahon sa maong hitabo.

Si SPO1 Jemelon Cutmaya sa Toledo City Police Station mibutyag sa Banat News ang mga nahanaw nga butang naglakip sa upat ka Engine Starter sa dumptruck nga mokantidad og P70 mil, Magnetic Bronze sa loader nga mokantidad og P15 mil, tulo ka altenator sa sakyanan mokantidad og P25 mil, duha ka coldrone sa sakyanan mokantidad og P2 mil ug mga panapton ug mga senina.

Subay sa inisyal nga imbistigasiyon sa kapolisan nasayran ang pagpanglungkab sa balay sa biktima nianang pagkahapon na   kagahapon dihang nadiskobrehan sa biktima sa iyang pag-abot sa ilang balay nga guba na ang gate niini.

Human hisayri sa kapolisan ang maong hitabo, gisikop dayon niini ang unom ka mga batan-on aron imbistigahon pamasin nga makatabang kini pagsulbad sa maong kawat. (BANATNEWS)