Napatay sa Banawa "gun for hire"

CEBU, Philippines - Sakop sa local gun-for-hire gang ang lalaking napusilan sa ulo ug natagak sa motorsiklo human kini namusil sa mga estambay diha sa sitio Gun Club sa Banawa sa barangay Guadalupe ning dakbayan.

Ang maong lalaki giila sa iyang asawa mao si Alfredo Beroja Jr., 32 molupyo sa sitio Crossing barangay Carreta. Samtang nasuta usab nga dili estambay ang mibawos pagpusil ug nakapatay kaniya tungod kay polis kini nga ‘covert operative.’

Ang hepe sa Cebu City Intelligence Branch, Chief Insp. Romeo Santander, mibutyag sa dihang nahinabi sa The Freeman nga igsuong pamantalaan sa Banat News  nga nailhan si Beroja tungod sa asawa niini nga si Maria Fe nga mitawag kaniya pipila ka minutos ang milabay human kini mapusili.

Si Santander mibutyag usab nga ang nakapusil kang Beroja mao ang sakop sa Mobile Patrol Group nga si PO1 Lester Miñoza kinsa diha sa maong dapit aron maniid sa usa ka panimalay.

Matud pang Santander nga si Beroja gituohang kauban sa usa ka Erwin Pedro kinsa nakuhaan og usa ka KG-9 submachine pistol sa mga sakop sa Guadalupe Police Station niadtong Biyernes sa gabii human makit-i sa mga tawo nga nagdala-dala sa maong armas.

Atol sa pagkasikop kang Pedro giingong gikataw-an kini sa mga estambay diha sa Banawa tungod sa pagkatumba sa iyang motorsiklo apan sa kapungot niini giwarawarahan niya sila sa maong armas apan gitabangan og sikop sa mga residente.

Nagduda karon si Santander nga posibleng manimalos unta sila si Beroja sa gidangatan ni Pedro apan naatlan nga diha si Miñoza nga naniid sa panimalay ni Pedro ug nakabawos kang Beroja.

“Posible nga resbak to ang ilang na buhat. Kay murag kauban man to nila ang nakuhaan og KG-9,” pasabot pa ni Santander.

Midugang usab si Santander nga tungod sa hulagway ni Beroja nga nag-bonnet ug armado posibleng sakop kini sa local gun for hire group.

Gipasabot usab ni Santander nga si Miñoza igo lang nga mi-return fire sa namusil sa tapok sa mga estambay. (Lesley Caminade-Vestil ug Ryan Sorote, The Freeman/EIM) (BANATNEWS)